Issittumi Ingeniøri tassaavoq ilinniartitaanermi sammivik diplomingeniør ukiunik sisamanik sivisussuseqartoq Arktisk Teknologimut specialilimmut silap pissusaanut imaannaanngitsunut suliaqarnissamut sammitinneqartoq, tamakkulu immikkut illuinnartunik teknologiimi aaqqiissutissanik aamma mianerisassanik piumasaqaateqarfiupput. Ilinniakkamik taamatut ittumik ingerlatsiffigisinnaasavit nunarsuarmi ikittuinnaat ilaat tassaavoq DTU.  

Kalaallit Nunaat aamma issittumi sumiiffiit annertuumik ineriartorput. Illut aamma aqqusernit sanaartorneqartussaapput, imeq aamma nukissiuutit pissarsiarineqassapput, imeq atorneqareersoq aamma eqqakkat piiarneqassapput kiisalu inuiaqatigiinnut aningaasarsiornikkut tunngaviliisoqartussaavoq pinngortitap pissarititai annertuut atornerisigut. Taamaattumik ingeniørit annertuumik pisariaqartinneqarput immikkut ittumik piginnaasaqartut, soorlu assersuutigalugu issittumut naleqqussakkanik sanaartornermut, attaveqaasersuutinik annertusaanermut sumiiffinni inuiaqatigiinni avinngarusimasuni, pinngortitami mianernartumi avatangiisinik qulakkeerinninnermi aamma imermik nukissiorfinnut sanaartornermut kiisalu aatsitassanik piiaanermut. 

Sammisat immikkut ittut tallimat

Illit sammisat immikkut ittut toqqarsinnaasatit tassaapput: 

  •    Sanaartorneq - sanaassanik ilusilersuineq & toqqavissanik ilusilersuineq
  •    Ikkussineq –  illuni nukissiaq, Illup iluata silaannaa & VVS
  •    Avatangiisit –  imeq, imeq igitassaq, eqqagassat & avatangiisinik misissuineq
  •    Sanaartorneq –  qaarsoq, nuna qeriuaannartoq & aatsitassat
  •    Pilersaarusiorneq  – attaveqaasersuutit, sumiiffinni & nuna tamakkerlugu pilersaarusiorneq

 

Matematikkimi Ilinniarnertuunngorniarfimmi ilinniartitsisoq 

Illit kalaaliuguit ilinniartitaanermik ingerlatsineq immikkut ittoq Ilisimatusarfik suleqatigalugu ingerlassinnaavat.

Kalaallit Nunaanni sumiiffinni ilisimatusarneq – Københavnimi imaluunniit nunani allani atuagarsorneq – Issittumi sulilluni sungiusarneq (praktik)

Ilinniagaqarnerup immikkoortuini siullerni pingasuni illit ilinniagaqarfissat tassaavoq Center for Arktisk Teknologi Kalaallit Nunaanni illoqarfiit annersaasa tullianni Sisimiuni, qaasuitsut killeqarfianit 50 kilometerinik avannarpasinnerusumi. Ilinniagaqarnermut immikkoortuisa sisamaanni aamma tallimaanni Københavnimi atuassaatit uani DTU-p Ballerup Campus. Ilinniagaqarnerup immikkoortuisa arfernanni Kalaallit Nunaanni imaluunniit issittumi sumiiffiit arlaanni ingeniøritut sulillutit sungiusassaatit. Ilinniagaqarnerup immikkoortuisa arfineq aappaanni DTU-mi imaluunniit nunami allami universitetimi nammineq toqqakkannik pikkorissarnerit ingerlatissavatit. Ilinniartitaaneq naammassineqassaaq ilinniartitaanerup immikkoortuisa arfineq pingajuanni diplomingeniøritut suliniuteqarnermik sumiiffinnut issittumut attuumassuteqartumik.    

Ilinniagaqarnermi avatangiisini kulturit amerlasuut

Ilinniagaqartut Danmarkimeersut aamma Kalaallit Nunaanneersut ilinniartitaanermi aallartittarput. Atuartitsineq danskisut ingerlanneqarpoq kiisalu killeqartumik tuluit oqaasii atorlugit, kiisalu illit eqimattakkaani kulturi aamma oqaatsit apeqqutaatinnagit suliaqartassaatit, taamaattumik oqaatsinut pikkorissuussaatit aamma allanit ilinnit allaanerusumik tunngaveqartunik suleqatiginninnissat ornigissavat.

Nunarsuarmi sumiluunniit sulineq

Ilinniakkamik naammassinnereeruit Kalaallit Nunaanni aamma sumiiffinni issittumi allani, soorlu assersuutigalugu Norgep avannaani, sulilernissamut periarfissaqarluarputit.

Annertunerusumik atuarit DTU-p nittartagaani http://www.dtu.dk/Uddannelse/Diplomingenior/arktisk-teknologi)