Aatsitassalerinermik Ilinniarfik - KTI Råstofskolen

Inuussutissarsiutitigut ilinniartitaaneq:

KTI Aatsitassalerinermik Ilinniarfiup inuussutissarsiutitigut ilinniartitaanermik periarfissippaatit, Kalaallit Nunaanni inuussutissarsiummut alligaluttuinnartumut sanaartornerup aatsitassalerinerullu iluani uunga allagartartaarnissamik: Sanaartornermi maskiinanik ingerlatitsisoq aamma qaarusummi sulisoq (212227).

Ilinniarneq inuussutissarsiutitigut ilinniartitaaneruvoq ukiunik sisamanik sivisussusilik, taannalu naggaserneqassaaq Aatsitassalerinermik Ilinniarfimmi svendinngussalluni misilitsinnermik.

Ukiut siulliit marluk Aatsitassalerinermik Ilinniarfimmi ingerlanneqassaaq, tassani atuagarsorneq sulillunilu ilinniartitsineq paarlakaajaanneqassapput, ukiuni kingullerni marlunni (qaammatit 24-t) suliffeqarfimmi sanaartorfiusumi qaarusummiluunniit sulinermik sungiusaatitut sulinissannut piareersarluarlutit. Ukiuni marlunni sungiusaammik sulereernermi svendinngorniarluni misilitsittoqassaaq. Angusisoqarpat ilinniartup svenditut allagartaq uppernarsaat pissarsiarissavaa, ilinniakkallu iluani imminut ilinniarsimasutut taasinnaalerluni.

Ilinniarneq aallartikkaanni suliffeqarfimmik sungiusaatitut sulinissamut isumaqatigiissummik pissarsereersimanissaq piumasaqaataanngilaq, taamaattorli 16-inik ukioqalereersimassaatit aamma Aatsitassalerinermik Ilinniarfimmi ilinnialinnginninni meeqqat atuarfianni inaarutaasumik misilitsinnermi Qallunaatut, Matematikkimi Tuluttullu angusisimassaatit.

Pikkorissarnerit:

Aatsitassalerinermik Ilinniarfiup ukiumoortumik pikkorissaanerit amerlasuut neqeroorutigisarpai, PKU-tut (ilinniarsimanngitsunut) aamma AMA-tut (ilinniarsimasunut) kiisalu pikkorissarnerit nunatsinni suliffeqarfinnut naatsorsuussat.

Ukiumi uani pikkorissarnerit neqeroorutigineqartut kti.gl-mi pikkorisarnerit allattorsimaffianni takukkit.