Assartugalerisoq - Terminalarbejder

Assartugalerisoq teknologi nutaaq malillugu sulisinnaassuseqarpoq – sullivimmi eqqorluartumik sulinissaq, pitsaassutsinut isumannaassutsinullu tunngasunik malinnaanermigut. Tamakkunanilu suliaqarnermini paasisimasariaqarpai maskiinat, quersuit, umiarsuit timmisartullu minnerunngitsumillu angallassinermi ingerlaatsit ineriartortuarmata.

Ilinniartuunerup nalaani uppernarsaatit makku pissarsiarineqassapput; biilersinnaanermut, kivittaatit ajassaataasalinnut, kranersinnaanermut, assartukkanut ulorianartunut passussisinnaanermut pikkorissarsimanermullu uppernarsaatit assigiingitsut sungiusaatigalugu suliffigisami naammassinissaanut pisariaqartinneqartut.

Ilinniagaq

Ilinniartuuneq suliffimmi sungiusarluni imalt. Najukkami Ilinniarfimmi aallarnisarluni aallartittarpoq. Tamanna pereerpat ilinniartut Saviminilerinermik Ilinniarfimmi sap.ak. 8-ni siullermeertumik ilinniariartortoqassaaq.

Piumasaqaatit

Ilinniartunngorniaraanni Najukami Ilinniarfimmiit imalt. kommunep kulturikkut ilinniartitaanermullu allaffeqarfikkut (KUF) imalt. suliffissarsiuussisarfimmiit qinnuteqartoqassaaq.

Karakteerinik 13 skala atorlugu misilitsinnikunut piumasaqaatit
Meeqqat atuarfianni 11. klassemi soraarummersimanissaq piumasaqaataavoq minnerpaamik karakterigalugit qallunaatut 6 aamma kisitsinermi 7.

Karakteerinik ECTS-skala atorlugu misilitsinnikunut piumasaqaatit
Meeqqat atuarfianni 10. klassimi soraarummeernissaq piumasaqaataavoq minnerpaamik karaktereralugit qallunaatut E aamma kisitsinermi D.

Ilinniartoq 17½-nik ukioqalereersimassariaqarpoq biilinik angalasinnaanermut allagartamik GF1-ip naggataani pissarsisinnaaniassagami. Pineqaatissinneqarsimannginnermut uppernarsaattaaq piumasaqaataavoq.

Ilinniartutut tigusaanissamut piumasaqaataavoq suliffimmik sungiusarfeqarneq. Suliffimmik sungiusarfissaqarnissaq ilinniartup namminneq akisussaaffigaa, ilinniarfiup Najukkamilu Ilinniarfiup ilinniartup sungiusarfissaanik nassaarniarnerani ikiorsinnaavaa.

Ilinniarnerup agguataarneqarnera: Ilinniarneq ukiunik 3-nik sivisutigaaq. Quersuarni ikiortitut ilinniarneq ukiunik 1½ -nik sivisussuseqarpoq.

Ima ingerlasarpoq

Ilinniarneq pingasunik immikkoortoqarpoq:

Ilinniarneq atuarfimmiittarnermik sungiusarnermillu paarlakaasuuvoq. Tunngaviusumi ingerlanermi ilinniarfimmiittarneq sap.ak. 8 + 12-nik sivisussuseqartoq, taaguuteqarlutillu GF1 aamma GF2.

Ilinniarnerup ingerlaqqinnerani arfineq pingasoriarluni ilinniarfimmiittarneq sap.ak. katillugit 29-nik sivisussuseqarpoq. Taaguuteqarlutillu H1, H2 aamma H3.

Ilinniarfimmiinneq pingasunik immikkoortunik ilinniagassartaqarpoq, taakku iluiniilluni quersuarni ikiortitut ilinniagaq:

Umiarsualivinni assartugassalerisutut - tamanna Saviminilerinermi Ilinniarfimmi ingerlanneqartarpoq.

Mittarfinni assartugassalerisutut - tamanna Saviminilerinermi Ilinniarfimmi ingerlanneqartarpoq.

Quersuarni assartugalerisutut ilinniarneq - toqqammaviusumik ilinniareernerup kingorna ilinniarneq DK-mi pissaaq.

Quersuarni ikiortitut ilinniarneq - toqqammaviusumik ilinniareernerup kingornga ilinniarneq DK-mi pissaaq.

Ilinniarneq aatsaat aallartinneqartarpoq ilinniartussat ikinnerpaamik arfiniliugaangata. Arfinilinnit ikinneruppata Danmarkimi ilinniarfimmut suleqatitsinnut nuunneqarsinnaapput, tassanilu ilinniartup ilinniarnermi sinnera ingerlatissavaa.

Ilinniarnermi aqqusagassat

Sullivimmi avatangiisit, sanaartukkanik pitsanngorsaaneq, sanaartukkat sullissinerlu, ikiueqqaarneq, tunngavisumik nalinginnaasumik qatserineq, qarasaasialerineq, uummaatsulerineq, qallunaatoorneq, angallannermut ilitsersuinissamut paasissutissiineq, qamutip sananeqarnera, aserfallatsaaliineq motoorilerinerlu, sullitanik sullissineq, pilersaarusiorneq toqqorsiviillu, nalinginnaasumik qarsorsaasarneq, ilivitsukkaani usilersuineq kiisalu usilersuineq sukarterinerlu, suliamut tunngassutilinnik paasisimasaqarneq, paasisitsinerit kivittaammut ajassaataasalimmut B-mut, assartukkat ingerlaariaasii, assartuinermilu kivitseriaatsit.