Saffiooq

Saffiuut sanaassat assigiinngitsorpassuarnik ilusillit angissusillillu saalimasut siaangasullu, ruujorit assigiinngitsunik issussuseqarlutillu ilusillit, titartakkat najoqqutassiallu assigiingitsut kiisalu ilitsersuutit assigiinngitsut oqaatsinik assigiinngitsunik allassimasut najoqqutaralugit suliarisarpaat.

Sulineq suliffissuarni, assartuiffinni, ikaartarfiliornerni umiarsualiornernilu nutaanillu sananerni iluarsaassinernilu pisarpoq.

Nipititerineq, najunngartiterineq, qiortaaneq, qapiarneq, tukkaaneq kiisalu saviminernik assigiingitsunik qinniliorneq ilinniassavatit. Saffiuutut tamatigooqisumi suliaqarfiusumi suliassaapputtaaq sullitat suliassaataannik ornigulluni ikkussuisarnerit.

Ilinniagaq

Ilinniartuuneq suliffimmi sungiusarluni imalt. Najukkami ilinniarfimmi aallarnisarluni aallartittarpoq. Tamanna pereerpat ilinniartut Saviminilerinermik Ilinniarfimmi sap.ak. 8-ni siullermeertumik ilinniariartortoqassaaq.

Piumasaqaatit

Ilinniartunngorniaraanni Najukami ilinniarfimmiit imalt. kommunep kulturikkut ilinniartitaanermullu allaffeqarfikkut (KUF) imalt. suliffissarsiuussisarfimmiit qinnuteqartoqassaaq.

Karakteerinik 13 skala atorlugu misilitsinnikunut piumasaqaatit
Meeqqat atuarfianni 11. klassemi soraarummersimanissaq piumasaqaataavoq minnerpaamik karakterigalugit qallunaatut 6, kisitsinermi 7, fysik 6 aamma tuluttut 6 assigisaanilluunniit piginnaasaqarneq.

Karakteerinik ECTS-skala atorlugu misilitsinnikunut piumasaqaatit
Meeqqat atuarfianni 10. klassimi soraarummeernissaq piumasaqaataavoq minnerpaamik karaktereralugit qallunaatut E, kisitsinermi D, fysik E aamma tuluttut E assigisaannilluunniit piginnaasaqarneq.  

Ilinniartutut tigusaanissamut piumasaqaataavoq suliffimmik sungiusarfeqarneq. Suliffimmik sungiusarfissaqarnissaq ilinniartup namminneq akisussaaffigaa, ilinniarfiup Najukkamilu ilinniarfiup ilinniartup sungiusarfissamik nassaarniarnerani ikiorsinnaavaa.

Ilinniartoq sungiusarfissaqanngikkuni, atuarfimmi sungiusarnissaminut qinnuteqarsinnaavoq.

ILINNIARNERUP AGGUATAARNEQARNERA:

Saffiuutut ilinniarneq ukiunik 4-nik sivisussuseqarpoq, taakkunannga sap.ak. 55-it ilinniarfimmi ingerlanneqartarput.

IMA INGERLASARPOQ:

Saffiuutut ilinniarneq atuarfimmiittarnermik sungiusarnermillu paarlakaasuuvoq. Tunngaviusumi ingerlanermi ilinniarfimmiittarneq sap.ak. 8+12-nik sivisussuseqarpoq, taaguuteqarlutillu GF1 aamma GF2.

Ilinniarnerup ingerlaqqinnerani sisamariarluni ilinniarfimmiittarneq sap.ak. katillugit 35-nik sivisussuseqarpoq. Taaguuteqarlutillu H1, H2, H3 aamma H4.

Ilinniarfimmiittarneq

Saviminilerinermik Ilinniarfiup Saffiuutut ilinniarneq tamaat ingerlattarpaa.

Ilinniarneq aatsaat aallartinneqartarpoq ilinniartussat ikinnerpaamik arfiniliugaangata, ilinniartut amerlanerpaagaangata 14-iusinnaapput.

Arfinilinnik ikinnerusut Danmarkimi ilinniarfimmut suleqatitsinnut nuunneqarsinnaapput, tassanilu ilinniartup ilinniarnermi sinnera ingerlatissallugu.

Atuarnermi ilinniagassat

Tunngaviusumi ilinniarnermi ilaatigut sisamanik siunertalinnik ilinniagassaqarputit: maskiinanik sakkunillu ilisimasaqarneq, sullivinni avatangiisit saviminernillu manngertornineq ajortunik nipititerinerni sillimaniarneq (nikkelkursus), kissassuseq atorlugu katiterineq aamma sanarfiineq.

Ilinniarnerup ingerlaqqinnerani toqqammavissatut makku sammineqassapput: qallunaatoorneq, uummaatsulerineq, inuiaqatigiilerineq, sanaartukkanik pitsanngorsaaneq, sanaartorneq sullissinerlu, atortussianik paasisimasaqarneq kiisalu tuluttoorneq.

Nalinginnaasumik ilinniagassat: killuineq sanarfiinerlu, kissassuseq atorlugu katiterineq, maskiinat assaallu atorlugit sanarfiineq, maskiinat aquttakkat atorlugit sanarfiineq, uuttueriaatsit, titartakkanik paasinnissinnaaneq nalunaarsuinerlu, inissititeriaatsit ikkussueriaatsillu kiisalu katitereriaatsit.

Immikkut itisilerlugit ilinniagassat: Titartakkanik paasinnissinnaaneq nalunaarsuinerlu, kissassuseq atorlugu katiterineq, maskiinat aquttakkat atorlugit sanarfiineq, killuineq ilusilersuinerlu kiisalu katiterineq ingutserinerlu.

Ilinniaqqinneq

Immikkut ilinniarsimasatit najoqqutaralugit makku ilinniaqqissinnaavatit: Produktionsteknolog imaluunniit installatør.