Qillerummik mikinermik atuineq

Qillerummik mikinermik atuineq tassaavoq sapaatit akunnerini pingasuni pikkorissarneq katillugit 120-nik akunnernik atuartitsinertalik. Ilinniartitsinermi siunertarineqarpoq pikkorissartup qaartiterinermik suliassani namminersuutigalugu qaqqami qillerinissaminut isumannaatsumik pilersaarusiortarnissaa.

Pikkorissarneq atuagarsornertaqarlunilu qillerummik suliaqarnermik ingerlatsinertaqarpoq.

Pikkorissarnerup agguataarneqarnera:

Qillerut – ingerlatsineq aserfallatsaaliuinerlu

Qillerummik assakaasutalimmik kiisalu atortunik ullormut aamma piffissaq aalajangersimasoq qaangiukkaangat pikkorissartoq misissuisassaaq, tassunga ilanngullugit nungullarsimasut taarsersorlugit aamma qillerutit nuuisa ipissartarnissaat. Qillerutit assigiinngitsut atornissaannut aserfallatsaaliortarnissaannullu illitsersorneqarnissaq piumasaqaataavoq. Aserfallatsaaliuisoqartanngippat tamanna kinguaattoornerit pissutigalugit suliffeqarfimmut isertitatigut akisoorujussuusinnaavoq.

Ujaqqat assigiinngitsut

Ujaqqat assigiinngitsut suuneri takusinnaanissaat pisariaqartuuvoq (tunngaviusumik nunap sannaa (geologi) pillugu ilisimasaqarneq), ataasiakkaallu qanoq imminnut assigiinngissuteqarnerat aamma ataasiakkaat qanoq pisarnerat qillerneqaraangamik. Pikkorissarnermi ilinniartut sungiusassavaat ujaqqat assigiinngitsut sapinngisamik amerlanerpaat suunerisa takusinnaanissaat aamma taakku mekaniskiusumik suliarineqarnerannut atatillugu sunik atortussaqarsinnaanerat.

Qillereriaatsit

Qaartiterinermi aqutsisup qillereriaatsit suliarissavai, taakku qillerummik qillerisumit isumagineqassallutik. Qillerinermut innersuussutit maleqqissaarneqassapput, taamatut tamatuma kingornatigut suliassat annikillisarniarlugit. Qillereriaasissani qilleriffissat sumiinneri, ititussusiat aamma sumut sammiveqarnersut apeqqutaassapput, pikkorissartullu nassuiarsinnaassavaa qillerinermi suliamut sunniutaasoq. Qillereriaatsit allanngortinneqarnerat qaartiterinermi aqutsisumit akuersissutigineqassapput.

Isumannaallisaanermut tunngasut

Qillerinermik suliaqarneq aamma qaartiterineq navianartortalimmik suliaqarneruvoq, pikkorissarnermi ilinniarneqassaaq avatangiisit – aamma sullivimmi avatangiisinut tunngasut malittarisassat eqqarsaatigalugit navianartunut qanoq pitsaanerpaamik illersuusertoqarsinnaanersoq. Ingerlanerani isumannaatsuunissamut eqqarsartariaatsip ataqatigiissaalluagaq saqqummiunneqassaaq aamma inuit ataasiakkaat isumannaatsuunissaannut atortut qillerinermik suliaqarnermut atatillugu ullutsinni atorneqartartut.