Aatsitassanik qillerineq

Common Core sap.ak.10-ni tunngaviusumik aatitassarsiornermut tunngasunik ilinniarfiuvoq maanakkumut siunissamilu Kalaallit Nunaani aatitassarsiornermut siunertaritinneqarluni taamaattumillu siunissami aatitassarsiortutut sulilernissamut ilimanaateqarluarluni.

Kisiannili tiguneqarnissamut piumasaqataavoq qinnuteqartut tuluttut piginnaasaqarluarnissaat taamaammat meeqqat atuarfianni tuluttut misilitsissimanermut angusarisimasat allatigullu tuluttut atuarsimanermut uppernarsaatit assilineri qinnuteqaat ilanngullugu nassiunneqassaaq.

Aatitassarsiorfiit allat tamangajammik tuluttut oqaasilinnik sulisoqarneri aammalu suliffimmi tuluit oqaasii atorneqartarneri pissutigalugu Common Core-mi atuartitsinermut tunngatillugu tuluttut oqaatsit teknikkimut tunnganerusut pingaarnertut atuartitsissutigineqarnissaat siunertarineqarpoq.

Maanakkorpiaq atuarfiup nammineerluni ilitsersuisui aatitassarsiornerup iluani fag-inut assigiinngitsunut ilinniartinneqarneri pissutigalugu ilimagissavat Norge-miit, Canada-miit aammalu USA-miit ilitsersuisunit atuartinneqarnissat.

Biilernermut allagartaqareersimaguit qinnuteqaatinnut tamanna ilisimatitsissutitut ilangutissavat Common Core-mi tamanna piumasaqataammat tassa Aatitassarsiornermut Ilinniarfimmi unnukkut atuartitsinermi.

Common Core-mi atuartitsissutitut anguniakkat

Ikiueqqaarnermut atuartitsineq (akunnerit 48)

Ikiueqqaarnermi teoreersornikkut aaqqissuulluakkamik ilisimalikkat najoqqutaralugit pikkorissartoq ikiueqqaarnermi annaassiniarsinnaangussaaq aammalu napisoornernut, uunnernut, ætsertoornernut, qerussornernut, tuparujussuarnernut innaallagiatigullu ajoqusernernut kukkuneqanngitsumik ikiueqqaarsinnaangussaaq. Pikkorissartoq ikiueqqaarnermut tuluttut atassuteqarsinnaasariaqarpoq.

Qarasaassiatigut atuartitsineq (Akunnerit 16)

Pikkorissartoq tunngaviusumik qarasaassiamik atuinissamik ilisimasaqassaaq programminik fil-inillu atuisinnaassalluni. Aammalu taakkua saniatigut digitalt kamera-mik, tekstbehandling-imik e-mail-imillu atuisinnaassaaq.

Geologi/Nunarsuup pinngoriartorneranik pissusianillu atuartitsineq (akunnerit 40)

Pikkorissartup sungiusarneq aqqutigalugu aatitassat ujaqqallu ilaat suussasai ilisimaarissavai aammalu ujaqqat ilaat qanoq pinngoriartortarneri ilisimassallugit.

Ujaqqat assigiinngitsut ilaat qillerneqarnissaminnut qaartiterneqarnissaminnullu piukkunnaateqarnersut ilisimassallugit.

Kalaallit Nunaata pinngoriartorneranik pissusianillu aammalu aatitassarsiornermik ilisimasaqassalluni.

Akuutissiat ikuallajasut (Akunnerit 8)

Pikkorissartup aatitassarsiornerup iluani akuutissat ikuallajasut ilisarnaasiornissai aammalu ulorianassusai naapertorlugit immikkoortiternissai ilisimaarissavai taamatullu aamma kukkuneqanngitsumik passunneqarnissai.

Ikuallattumik qamiterineq (Akunnerit 8)

Pikkorisartoq qamiterutinik atuisinnaassaaq aammalu nammineerluni ikuallattumik qamiterisinnaasariaqarluni. Pikkorissartoq ikuallattoornermut atatillugu tuluttut atassuteqarsinnaassaaq.

Aatitassat qinngornernik avatangiisinullu navianaatillit (Akunnerit 4)

Pikkorissartup aatitassanik piiaffimmi aatitassat qinngornernik avatangiisinullu navianaateqarneri ilisimaarissavai isumannaallisaanerlu eqqarsaatigalugu kukkuneqanngitsumik suliarisinnaasallugit.

Uutortaatit/Uutortaaneq/Nalunaarsuineq (Akunnerit 4)

Pikkorissartup nammineerluni aatitassat qinngornernik avatangiisinullu navianaateqarnersut uutortarsinnaasavai taakkulu aatitassarsiorfiup pisortaanut tuluttut nalunaarutigisinnaasallugit.

Namminermut isumannaallisaanermut atortut (Akunnerit 8)

Pikkorissartup namminermut aammalu isumannaallisaanermut atortut pitsaassusai misissoqqissaarnissai aammalu aserallatsaaliornissai nammineerluni suliarisinnaassariaqarpai.

Inuiaqatigiit iluanni nunanilu allani inatsit peqqussutillu (Akunnerit 8)

Pikkorissartup suliffimmi avatangiisinullu inatsit maleruagassallu inuiaqatigiit iluanni nunanilu allani aatitassarsiornerup iluani atuuttut ilisimaarissavai taakkulu naapertorlugit sulisinnaasariaqarluni.

Surface-mining/Nunap qaavani isumannaallisaanermut najoqqutassat (Akunnerit 8)

Pikkorissartup aatitassarsiorfiup iluani isumannaallisaanermut najoqqutassiat nalinginnaasut ilisimaarissavai nammineerlunilu taakkua tuluttut suliarisinnaasallugit.

Surface-mining/Nunap qaavani aaqqissugaaneq (Akunnerit 6)

Pikkorissartup nunap qaavani aatitassarsiorfiup sanarfineqarneranut atatillugu aaqqissugaanera ilisimaarissavaa aammalu suliassat, suliassat suussusaat aammalu akisussaaffinnik agguataarinerit tuluttut suliarisinnaasallugit.

Surface-mining/Nunap qaavani atassuteqarneq (Akunnerit 10)

Pikkorissartup nammineerluni sulinerup tungaatigut sulisut atassuteqarfigisinnaasariaqarpai aammalu nunap qaavani aatitassarsiorneq pillugu suliassat suussusai aqutsisullu tuluttut atassuteqarfigisinnaasallugit.

Surface-mining/Nunap qaavani maskiinanik ilinniarneq (Akunnerit 8)

Pikkorissartup suulluunniit maskiinat tamaasa qanorlu atorneqarnissai ilisimaarissavai aammalu tuluttut oqariartaatsit tamaasa ilisimassallugit.

Pikkorissartup nammineerluni isumannanngitsumik sannatit assammik atugassiat atorsinnaasariaqarpai.

Surface-mining/Nunap qaavani maskiinat isumannaatsuunissaat (Akunnerit 8)

Pikkorissartup suulluunniit maskiinat tamaasa isumannaatsuunissaat tuluttut ilisimaarissavai aammalu suliffimmi namminermut sulisullu allat isumannaatsuunissaat eqqarsaatigalugu sulisinnaasariaqarluni.

Kisitsineq (Akunnerit 12)

Ukunannga uteqqiinneq kisitseriaatsit 4-mat, atuagarsuutigaluni kisitsineq, kisitsisaatip kaasarfimmiortakkap atornissaa, nunami immikkoortortani naatsorsuineq, annertussuseq, aggornilersuineq aammalu procentilersuineq.

Titartaaneq/nunap assinga aammalu uutortaaneq (Akunnerit 20)

Pilersaarut aggornerillu malillugit titartaaneq, uutortaariaatsit, suliap titartakkallu takissusaassa naatsorsorneri, nunap assingisa ilisarnaataat, koterit, nalit, titartagaq malillugu ilusilersuineq, uvinganernik naatsorsuineq, titartakkamik paasinnissinnaaneq aammalu nunarsuup pinngoriartorneranik pissusianillu asseq.

Surface-mining/Nunap qaavani ikkussuineq (Akunnerit 16)

Tunngaviusumik innaallagissanik ikkussuinermut ilinniarneq AC/DC, generator-it, transformer-it, ledningilersueriaatsit, naqitsinilersueriaatsit, erngup aqqutissaanik ikkussueriaatsit il.il.

Surface-mining/Nunap qaavani qartiterinermut inatsit maleruagassallu (Akunnerit 4)

Pikkorissartup qaartiterutissat toqqorneqartarnerannut, angallanneqartarnerannut aammalu atorneqarnissannut isumannaallisaanermut aalajangersakkat inatsimmilu nalunaarutit allat atuuttut ilisimaarissavai.

Surface-mining/Nunap qaavani qaartiterinermut ilinniarneq (Akunnerit 8)

Pikkorissartup qaartiterutissat, qillerinissamut/qaartiterinissamut piareersarneq, piareersaariaatsit, ikitseriaatsit aammalu qaartitereriaatsit ilisimaarissavai.

Surface-mining/Nunap qaavani qaartiterinermi isumannaallisaaneq (Akunnerit 4)

Pikkorissartup isumannaallisaanermut ungasissusissat, immikkoortiterineq, poortuineq, nalunaaqqutsiineq aammalu ulorianartunik allagartalersuineq taamatullu akuutissiat qaajasut angallanneqartarnerannut isumannaallisaaneq ilisimaarissavaa.

Surface-mining/Nunap qaavani angallassinermi isumannaallisaaneq (Akunnerit 8)

Pikkorissartup qulimiguullit sling atorlugu atortussanik assartuineranni isumannaallisaanermut maleruaqqusat suleriaatsillu aammalu umiarsuakkut saviminissanik assartuisarneq ilisimaarissavai.

Underground/Nunap iluani isumannaallisaanermut maleruaqqusat (Akunnerit 8)

Pikkorissartup aatitassarsiorfimmi isumannaallisaanermut maleruaqqusat nalinginnaasut aammalu nammineerluni tuluttut suliarinissai ilisimaarissavai.

Underground/Nunap iluani aaqqissugaaneq (Akunnerit 8)

Pikkorissartup nunap iluani aatitassarsiorfiup sanarfigineqarneranut atatillugu aaqqissugaanera aammalu suliassat, suliassat suussusaat aammalu akisussaaffinnik agguatarisinnaanerit tuluttut suliarisinnaallugillu ilisimaarissavai.

Underground/Nunap iluani atassuteqarneq (Akunnerit 16)

Pikkorissartup nammineerluni sulinerup tungaatigut sulisut atassuteqarfigisinnaasariaqarpai aammalu nunap iluani aatitassarsiorneq pillugu suliassat suussusai aqutsisullu tuluttut atassuteqarfigisinnaasariaqarlugit.

Underground/Nunap iluani maskiinanik ilinniarneq (Akunnerit 16)

Pikkrissartup suulluunniit maskiinat tamaasa qanorlu atorneqarnissai ilsimaarissavai aammalu tuluttut oqariartaatsit tamaasa ilisimassallugit.

Pikkorissartup nammineerluni isumannanngitsumik sannatit assammik atugassiat atorsinnaasariaqarpai.

Underground/Nunap iluani maskiinat isumannaatsuunissaat (Akunnerit 8)

Pikkorissartup suulluunniit maskiinat tamaasa isumannaatsuunissaat tuluttut aammalu suliffimmi namminermut sulisullu allat isumannaatsuunissaat eqqarsaatigalugu ilisimaarissavai.

Underground/Nunap iluani suleriaatsit (Akunnerit 24)

Pikkorissartup suleriaatsit tamaasa aammalu nunap iluani suleriaatsinut tuluttut oqariartaatsit ilisimaarissavai.

Underground/Nunap iluani ikkussuinerit (Akunnerit 16)

Innaallagiaq, silaanarissarfik, naqitsineq, angallassineq aammalu vaajarinik ikkusuineq.

Underground/Nunap iluani qaartitereriaatsit isumannaallisaanerlu (Akunnerit 8)

Pikkorissartup nunap iluani qaartiterinissamut qillerinerit/qaartitsinerit, piareersarnerit, ikitseriaatsit aammalu qaartitereriaatsit ilisimaarissavai aammalu qaartiteriffiusumi isumannaallisaanermut aalajangersakkat tamaasa malinnissai.

Underground/Nunap iluani innaallagissap aqqutaanik sulineq (Akunnerit 14)

Pikkorissartup nunap iluani innaallagissap aqqutaanik ikkussueriaatsit suleriaatsillu ilisimaarissavai aammalu isumannaallisaanermut aalajangersakkat tamaasa malinnissai.

Biilernermut sungiusarneq

Pikkorissartoq suli billernermut allagartartaarsimanngikkuni pikkorissarnerup saniatigut unnukkut biilernermut sungiusarnissamut atuartinneqassaaq.

Common Core-mut tunngatillugu aningaasatigut atugassaritaasut

Namminersornerullutik Oqartussat angalanermut, nerisaqarnermut unnuinermullu aningaasartuut akilissavai.

Pikkorissarnissamut aggersarneqarninnut atatillugu atuarfiup angalanissat angalaninnullu atatillugu unnuinissat isumagissavai.

Atuarfiup Ineqarfianni ineqartitsisoqartarpoq tamakkiissumik nerisaqaatigaluni. Ineqarfiup inissaqartitsinera killeqarmat ilaquttat/aapparisaq nassaqqusaangilaq.

Namminersornerullutik Oqartussat atuartitsinermut aammalu atortussanut aningaasartuutit akilissavai.

Sap.ak.pikkorissarnermi ajunngitsorsiassaq kr.3.250,00. Taakkulu ilinnut tunniuneqartartussaapput sulisitsisorisannuungitsoq. Ajunngitsorsiassat aningaasarsiassaraluanik annaasaqarnermut taartisiaapput taamaammallu akileraarutigisassaallutik.