Sanaartornermi maskiinanik ingerlatsisoq

Takorloorsinnaaviuk aqqusernit, umiarsualiviit imaluunniit timmisartoqarfiit sanllugit aallartinneranni bulldozersuarmik aqullutit? Taava Sanaartornermi maskiinanik ingerlatsisutut ilinniarneq ilinnut naleqquppoq. Sanaartornermik maskiinanik ingerlatsisutut ilinniarnerup imarai:

• Sanaartornermi maskiinat assigiinngitsut sananeqarnerinik aamma atorfissaannik ilisimasaqarneq.
• Kalaallit Nunaanni sanaartornermik pissutsit ilitsersuussutigineqarnerat
• Sanaartornermi periutsit soorlu nunagissaanerit, aqqusinernik aamma erngup aqqutissaannik sanaartoriaatsit.

Ilinniarneq

Ilinniarneq ukiuni marlunni ilinnirfimmi atuarneruvoq, ukiuni marlunni suliffimmi sungiusarnermik malitseqartoq. Ilinniarneq naammassineqassaaq inaarutaasumik misilitsinnermik. Ukiuni siullerni marlunni ilinniarneq Sisimiuni ingerlanneqassaaq. Ukioq siulleq ilinniartut ataatsimut atuassapput. Ukiup aappaanni ilinniagassaq toqqakkat aallartissavat; Sanaartornermi Maskiinanik ingerlatsineq imaluunniit Qaarusummi Sulisutut ilinniarneq.

Ilinniarfimmi ukioq siulleq ataatsimut atuartitsissutit ingerlanneqassapput, suliamik ilinniarneq, sanaartornermik aamma maskiinanik ilinniarneq. Ilinniarnerup ukiuata aappaani ataatsimut atuartitsinerup imaraa, suliamut tunngasumik iinniarneq aamma sanaartornermik ilinniarneq, ilinniagaq sorleq aallartinnerit apeqqutaatillugu sanaartornermut tunngasumik ilaneqassapput.

Piumasaqaatit

• Meeqqat atuarfianni tuluit oqaasiinik, matematik, qallunaatut aamma fysikimi soraarummeersimaneq piumasaqaataavoq, tuluit oqaasii aamma matematikkimi karakterit pitsaasut iluaqutaassapput. 
• Ilinniarnerup aallartinnginnerani 16´inik ukioqalereersimassaatit.
• Biilinik ingerlatitsinissamut allagartaqanngikkuit, sulliffimmik sungiusarlutit aallartinnissat sioqqullugu peqalernissat isumagissavarput.
• Timivit atorluarsinnaanissaa kissaatiginarpoq.